Na procura de Xesús Nieto Pena (I)
Xesús González Gómez.
O martes, 21 de abril de 1964, o vespertino compostelán La Noche, na súa última páxina, e enmarcada dentro da sección titulada «Panorama cultural de Galicia», daba, entre outras, a seguinte noticia (poñémola en galego): «XESÚS NIETO PENA. / En Carcassonne (Aude), acaba de morrer o escritor e xornalista galego, don Xesús Nieto Pena, director das emisións en galego de Radio París. A noticia da súa morte foi difundida o domingo pola noite na emisión Aló, Galicia. Hai moi pouco que don Xesús Nieto Pena enviáranos unha carta dándonos conta do concurso literario “Galicia 64”, instituído polas emisións que el, con tanto entusiasmo e cariño, viña dirixindo. O seu enderezo en Carcassonne, era: 21 rue 4 de Septembre. Descanse en paz.» (O do enderezo, non acabo de entendelo.) A noticia apareceu, dunha ou outra maneira, en case toda a prensa galega da época. O mesmo día 21 daquel mes de abril de 1964, no diario de Pontevedra, A. R. C., asinaba unha columna titulada: «Nieto Pena ha muerto». Segundo A. R. C., Xesús Nieto Pena (pon o nome en galego, cousa que non fixo La Noche) morreu repentinamente en Carcassonne, onde daba clases de lingua e literatura españolas. A morte causou grande impresión entre as persoas que escoitaban a emisión Aló, Galicia. «Orensano de nacimiento, buen poeta, ensayista, crítico literario, director y colaborador de diversas revistas literarias españolas y extranjeras, desde su paso por la iniversidad compostelana se había entregado generosamente a la defensa de los intereses espirituales de Galicia». Dende 1954, continua A. R. C., viña realizando Aló, Galicia, «el único programa en lengua gallega de Europa. Con él se va y se pierde, pues –extraña paradoja–, la voz cálida, ejemplar y alentadora del mundo consciente y interesado en la salvación de Galicia». Continúa dando a noticia dos premios literarios creados polo finado e que agora, homenaxe da O.R.T.F., levarán o nome de Nieto Pena. E acaba a necrolóxica con estas palabras: «Resulta muy emotivo seguir la correspondencia que hemos sostenido en estos últimos meses. Enfermo, con fiebre, se trasladaba desde Carcassonne a los estudios de París para hablar con nosotros y de su Galicia que tanto amó. El soñaba este verano –nos decía en una de sus cartas– “vir beixar as pedras santas, os millos garimosos, o verde manto da paisaxe galega”. Ya no podrá realizar su sueño. Descanse en paz».
Cinco días despois, o domingo, 26 de abril, Ánxel Fole (co pseudónimo de Neumandro), no xornal El Progreso, na sección «Meridiano», publica un artiguiño titulado «Recuerdo de Xesús Nieto Pena». Fole di que ten recordos parcos, pero moi claros da estadía durante uns poucos días de Nieto Pena en Lugo. Foi no inverno do 36. Ía moito frío. Levárono (a Nieto Pena) a casa de Luís Pimentel. Como ía tanto frío, visitaban as cafetarías e os bares que tiñan calefacción. Nieto Pena tiña o proxecto de crear unha revista galega en Madrid. E como asistira a unha conferencia sobre o celtismo na Universidade de verán de Santander, estaba entusiasmado co celtismo. Fole lembra a quen foron, en tempo republicano, animadores do celtismo, entre eles Álvaro de las Casas, que fundou a agrupación Ultreya. Esta agrupación «tenía un himno o marcha de camino donde se invocaba a las “Sete naciós celtas, fillas do Rei Breogán”. Y una signia llamada trisquel, que era el esquema del corredor, que no dejaba de parecerse a la cruz gamada de los racistas germanos», cousa que Fole e os seus amigos non vían con bos ollos e coidaban que significaba unha manifestación de «feixismo». Gastaban bromas sobre esa organización e atribuíanlle –humorísticamente– un programa de reivindicacións territoriais: «Pedimos la anexión a Galicia de Chaves y de… Nogales”… Haciendo un juego de palabras con los dos apellidos del popular –entonces– redactor-jefe del diario madrileño Ahora […]». Cinco ou seis anos despois, Fole preguntoulle a un amigo común por onde andaría Nieto Pena, e díxolle que vivía en Madrid. Tempo despois aseguráronlle que vivía en Chile. «Recientemente supimos que vivía en París y que era el organizador y director de las emisiones Aló, Galicia en lengua gallega de Radiodifusión-televisión francesa». Oíu unhas cantas, e delas algunhas moi interesantes. Tamén, escribe, era catedrático de Lingua e Literatura española no instituto de Carcassonne. «Y entonces nos acordamos de aquel muchacho de pequeña estatura y paso menudo y presto que nos visitara en Lugo, en el lejano invierno del treinta y seis. Nos había dado la impresión de un intelectual inquieto y emprendedor, con marcada tendencia al nomadismo. Uno de esos gallegos que “non acougan”.// Descanse en paz el inolvidable amigo y valioso escritor, tan amante de su tierra».
Dous días despois de se publicar o artigo de Ánxel Fole, o 28 de abril, en La Región, co título «Don Jesús Nieto Pena ha muerto» aparece un artigo-necrolóxica asinado por Daniel. Coa lectura do artigo saberemos que se trata de Daniel González Rodríguez, autor de Así canta Galicia, libro publicado en 1963 con prólogo de Otero Pedrayo. Empeza o autor dicindo que cando escoitaba o programa Aló, Galicia soubo, con verdadeira mágoa, da morte de Xesús Nieto Pena. «Era este un señor gallego cien por cien, que había realizado sus estudios aquí en Orense, en el colegio de los P. P. Salesianos». Despois de lembrar o seu traballo en Carcassonne e que o programa que dirixía «comunicaba al mundo con todo entusiasmo y emoción, el movimiento literario, artístico y cultural de nuestra querida Galicia», informa a quen lea o escrito que o pasado 22 de marzo fixo, no citado programa radiofónico, un comentario «harto elogioso» do seu libro. Reproduce o comentario e logo informa de que Nieto Pena visitaba cada ano Galicia e que ese 1964 anunciara que iría a Ourense, a ver o seu grande amigo Otero Pedrayo e saudar a «José Gallego y a mí, con quien sostenía correspondencia desde la publicación de mi libro Así canta Galicia». E acaba, como bo cristián: «Que el señor misericordioso se haya compadecido de su alma y la tenga ya en su Santo Seno».
Da emigración só coñezo o que se publicou en Opinión Gallega, de Buenos Aires, número 211, correspondente a maio de 1964. Xusto debaixo das bases dos premios que se concederían no programa Aló, Galicia, vén a «necrolóxica»: «Murió Nieto Pena». Digamos que esta «necrolóxica» copia bastantes liñas da de Daniel González, e continúa coas seguintes liñas, que, evidentemente, non se podían publicar na Galicia daquel 1964: «Buen patriota gallego y buen demócrata, sufrió la persecución del franquismo, no obstante el ferviente catolicismo que siempre caracterizó a Nieto Pena». Segundo o redactor da nota, e supomos que o soubo polo propio Nieto Pena, «se le encerró en la cárcel de Burgos, allí tuvo, como él solía decir, “el alto honor de ser compañero de cadena” del eminente socialista, profesor Julián Besteiro, muerto en prisión, y del diputado catalán y líder católico Carrasco Formiguera, poco después fusilado por Franco». E acaba o escrito con estas palabras: «A su esposa, la eminente pianista Letizia Gandolfi, que fue su dulce compañera de exilio en Lima, Buenos Aires, Roma, París y finalmente en Carcasona, le presentamos emocionados la viva expresión de nuestro pésame».
Un ano despois, o domingo 2 de maio de 1965, en Faro de Vigo, na páxina de necrolóxicas saía a seguinte:
PRIMER ANIVERSARIO DEL SEÑOR
DON JESUS NIETO PENA
FALLECIÓ EN CARCASSONNE (FRANCIA), EL DÍA 16 DE ABRIL DE 1964, CONFORTADO POR LOS SANTOS SACRAMENTOS Y LA BENDICIÓN DE SU SANTIDAD
D. E. P.
Su esposa, Adela Santamaría Ruíz¸ hijos Jesús y Adela; su hija política Encarnación Pelayo; hermanos y demás familia,
RUEGAN a sus amistades una oración por su alma y asistencia a los funerales que, por su eterno descanso, se celebrarán mañana, lunes, día 3, a las NUEVE MENOS CUARTO, en la Con-Catedral de Vigo, por cuyos favores reciban gracias.
Para A. R. C., que se carteaba con el, Xesus Nieto Pena era ourensán, o mesmo que para o anónimo redactor de Opinión gallega, pola súa parte tanto Gerardo González Martín, «Nieto Pena propuso hacer de San Simón un cementerio de poetas que cantaron al mar» (Faro de Vigo, 9 de maio de 1998) e Ceferino de Blas, «El vigués del “Aló Galicia”» (Faro de Vigo, 21 de novembro de 2016) afirman que nacera en Vigo, xa que ambos o alcuman de «vigués».
Daniel González, no seu escrito, afirma que Nieto Pena estudou nos PP. Salesianos de Ourense, en troques, José Gallego, que segundo o autor de Así canta Galicia tamén mantiña correspondencia co director de Aló, Galicia, nunha carta dirixida ao alcalde de Ourense, David Ferrer Garrido, e publicada en El Pueblo Gallego o 29 de xaneiro de 1964, afirma que Nieto Pena «fue alumno del Colegio de Maristas de esta ciudad», da cidade das Burgas.
Se se le con atención todo o que se leva escrito e transcrito, verase que hai contradicións, contradicións que intentaremos «resolver» en próximas entregas.
